
கேரளா · சுற்றுலா இடம்
மூணாறு: தேயிலைச் சரிவுகள், வரையாடு, மூடுபனி — எத்தனை நாள் போதும்?
Munnar: Tea slopes, Nilgiri tahr and mist — how many days do you really need?
மூணாறு பயணத்துக்கு எளிய வழிகாட்டி: இரவிகுளம், டாப் ஸ்டேஷன், மாட்டுப்பெட்டி, மறையூர், போகும் வழி, சீசன், தங்குமிடம், உணவு, 1–2 நாள் திட்டம்.
பார்க்க வேண்டிய இடங்கள்
- 1
இரவிகுளம் தேசியப் பூங்கா (ராஜமலை) (Eravikulam National Park (Rajamalai))
வனவிலங்கு · தேவிகுளம்
அழிவின் விளிம்பில் இருக்கும் நீலகிரி வரையாடுகளை அருகில் பார்க்கக்கூடிய இடம். நுழைவாயிலிலிருந்து வனத்துறைப் பேருந்தில் மேலே செல்ல வேண்டும். வரையாடுகள் குட்டி போடும் காலத்தில் மூடப்படும்.
- 2
டாப் ஸ்டேஷன் (Top Station)
மலை · தேவிகுளம்
கேரளா–தமிழ்நாடு எல்லையில் உள்ள உயரமான காட்சி முனை. தெளிவான காலையில் கீழே தேனி சமவெளி முழுவதும் தெரியும். மதியத்துக்குப் பின் மேகம் மூடிவிடுவது வழக்கம்.
- 3
மாட்டுப்பெட்டி அணை (Mattupetty Dam)
மற்றவை · தேவிகுளம்
படகு சவாரிக்குப் பெயர் போன நீர்த்தேக்கம். சுற்றியுள்ள புல்வெளியில் சில நேரம் காட்டு யானைகள் தென்படும். டாப் ஸ்டேஷன் போகும் வழியில் இருக்கிறது.
- 4
தேயிலை அருங்காட்சியகம் (Tata Tea Museum, Nallathanni)
அருங்காட்சியகம் · தேவிகுளம்
மூணாறு தேயிலைத் தொழிலின் வரலாற்றைச் சொல்லும் இடம். பழைய இயந்திரங்களையும் தேயிலை தயாரிக்கும் முறையையும் பார்க்கலாம். தேயிலையை ருசி பார்த்து வாங்கவும் முடியும்.
- 5
எக்கோ பாயிண்ட் (Echo Point)
மற்றவை · தேவிகுளம்
ஏரிக்கரையில் எதிரொலி கேட்கும் இடம். குழந்தைகளுக்குப் பிடிக்கும். வார இறுதிகளில் கூட்டம் அதிகமாக இருக்கும்.
- 6
குண்டலை ஏரி (Kundala Lake)
மற்றவை · தேவிகுளம்
குண்டலை அணையை ஒட்டிய அமைதியான ஏரி. மிதிபடகு சவாரி செய்யலாம். டாப் ஸ்டேஷன் சாலையில் இருக்கிறது.
- 7
ஆட்டுக்கல் அருவி (Attukal Waterfalls)
அருவி · தேவிகுளம்
டவுனிலிருந்து சுமார் 9 கி.மீ. தூரத்தில் உள்ள அருவி. மழைக்காலத்திலும் அதற்குப் பிறகும் நீர் அதிகமாக விழும். சுற்றியுள்ள பகுதியில் சின்ன நடைப்பயணம் செய்யலாம்.
- 8
லக்கம் அருவி (Lakkam Waterfalls)
அருவி · தேவிகுளம்
மறையூர் சாலையில் காட்டுக்குள் இருக்கும் அருவி. ஆழமில்லாத பகுதியில் கால் நனைக்கலாம். மறையூர் போகும் வழியில் நிறுத்திப் பார்க்க ஏற்றது.
- 9
மறையூர் சந்தனக் காடு, முனியறைகள் (Marayur Sandalwood Forest and Dolmens)
பாரம்பரியம் · தேவிகுளம்
இயற்கையாக வளரும் சந்தன மரக் காடுகளும் கற்கால முனியறைகளும் உள்ள பகுதி. மறையூர் வெல்லமும் இங்கே பிரபலம். மூணாறிலிருந்து சுமார் 40 கி.மீ.
- 10
சின்னார் வனவிலங்கு சரணாலயம் (Chinnar Wildlife Sanctuary)
வனவிலங்கு · தேவிகுளம்
மழை மறைவுப் பகுதியில் உள்ள வறண்ட காடு. சாம்பல் நிற அணில், மான், சில நேரம் யானைகளையும் பார்க்கலாம். உடுமலைச் சாலையில் தமிழ்நாடு எல்லையை ஒட்டி இருக்கிறது.
- 11
கொழுக்குமலை (Kolukkumalai)
மலை
உலகின் உயரமான தேயிலைத் தோட்டங்களில் ஒன்று. சூரிய உதயத்தைப் பார்க்க அதிகாலை ஜீப்பில் செல்ல வேண்டும். சாலை மிகக் கரடுமுரடானது.
- 12
ஆனையிறங்கல் அணை (Anayirangal Dam)
மற்றவை
தேயிலைத் தோட்டங்களுக்கு நடுவே இருக்கும் அமைதியான நீர்த்தேக்கம். மூணாறிலிருந்து சுமார் 22 கி.மீ. கூட்டம் குறைவாக இருக்கும் இடம்.
எப்படி செல்வது
சாலை
கொச்சியிலிருந்து கோதமங்கலம்–அடிமாலி வழியாகச் சுமார் 125–130 கி.மீ.; மதுரையிலிருந்து தேனி–போடிமெட்டு வழியாகச் சுமார் 160 கி.மீ.; கோவையிலிருந்து உடுமலை–சின்னார்–மறையூர் வழியாகச் சுமார் 160 கி.மீ. தமிழ்நாடு, கேரள அரசுப் பேருந்துகள் உண்டு.
ரயில்
அருகிலுள்ள பெரிய ரயில் நிலையங்கள் ஆலுவா (சுமார் 110 கி.மீ.), எர்ணாகுளம் (சுமார் 130 கி.மீ.). தமிழ்நாடு பக்கம் போடிநாயக்கனூர் (சுமார் 70 கி.மீ.). அங்கிருந்து பேருந்து அல்லது டாக்ஸியில் செல்லலாம்.
விமானம்
கொச்சி சர்வதேச விமான நிலையம் சுமார் 110 கி.மீ., மதுரை விமான நிலையம் சுமார் 150–160 கி.மீ. இரண்டிலிருந்தும் டாக்ஸியில் 3–4 மணி நேரப் பயணம்.
மூணாறு எப்படிப்பட்ட இடம்?
மூன்று ஆறுகள் சேரும் இடம் என்பதால்தான் மூணாறு (Munnar) என்ற பெயர். முதிரப்புழா, நல்லதண்ணி, குண்டலை ஆறுகள் இங்கே சந்திக்கின்றன. கேரளாவின் இடுக்கி மாவட்டத்தில், கடல் மட்டத்திலிருந்து சுமார் 1,600 மீட்டர் உயரத்தில் இருக்கும் இந்த ஊரைச் சுற்றி எங்கு பார்த்தாலும் தேயிலைத் தோட்டங்கள்தான். மலைச்சரிவு முழுவதும் யாரோ சீப்பால் வாரிவிட்டது போல் வரிசை வரிசையாகச் செடிகள் நிற்கும்.
தமிழ்நாட்டிலிருந்து போகிறவர்களுக்கு ஒரு சின்ன ஆச்சரியம் காத்திருக்கிறது. டவுனில் கடைக்காரர், ஆட்டோ டிரைவர், தோட்டத் தொழிலாளி என பலரும் தமிழ் பேசுவார்கள். ஆங்கிலேயர் காலத்தில் தேனி, மதுரைப் பக்கத்திலிருந்து தோட்ட வேலைக்கு வந்தவர்களின் வாரிசுகள் இவர்கள். அதனால் மொழிப் பிரச்சனை பெரிதாக இருக்காது.
குடும்பங்களுக்கும் தேனிலவு ஜோடிகளுக்கும் மூணாறு ஏற்ற இடம். நடைப்பயணம், மலையேற்றம், அதிகாலை சைக்கிள் சவாரி என்று சாகச விரும்பிகளுக்கும் வேலை இருக்கிறது. ஆனால் கோயில் நகரம் போல ஆன்மிகப் பயணத்துக்கான இடம் இல்லை. இங்கே முக்கியமானது இயற்கையும் குளிரும்தான். ஒரு குறை: நீண்ட வார இறுதி நாட்களில் டவுன் சாலைகளில் வண்டிகள் நெரிசலாக நின்றுவிடும். பொறுமையை எடுத்துக்கொண்டு போவது நல்லது.
பார்க்க வேண்டிய இடங்கள்
இரவிகுளம் தேசியப் பூங்கா (Eravikulam National Park) மூணாறின் முதல் இடம். டவுனிலிருந்து சுமார் 13 கி.மீ. தூரம். இங்குள்ள ராஜமலைப் பகுதியில் அழிவின் விளிம்பில் இருக்கும் நீலகிரி வரையாடுகளை மிக அருகில் பார்க்கலாம். நுழைவாயிலிலிருந்து வனத்துறைப் பேருந்தில் மேலே அழைத்துச் செல்வார்கள். காலை 8 மணிக்குள் போய்விட்டால் வரிசை குறைவு, மூடுபனியும் இன்னும் விலகியிருக்காது. வரையாடுகள் குட்டி போடும் காலத்தில் (பொதுவாக பிப்ரவரி–மார்ச் வாக்கில்) பூங்கா மூடப்படுவது வழக்கம். போகும் முன் வனத்துறையின் அதிகாரப்பூர்வ தளத்தில் உறுதி செய்துகொள்ளுங்கள்.
தென்னிந்தியாவின் மிக உயர்ந்த சிகரமான ஆனைமுடி (Anamudi) இரவிகுளத்தை ஒட்டியே இருக்கிறது. அதன் உயரம் சுமார் 2,695 மீட்டர். பொதுமக்கள் சிகரம் வரை ஏற அனுமதி இல்லை. ராஜமலையிலிருந்து தூரத்தில் அதன் உருவத்தைப் பார்த்துக்கொள்ளலாம்.
டாப் ஸ்டேஷன் (Top Station) போகும் சாலையில் மூன்று நிறுத்தங்கள் வரிசையாக வருகின்றன. முதலில் மாட்டுப்பெட்டி அணை (Mattupetty Dam). இங்கே படகு சவாரி செய்யலாம், அணையைச் சுற்றிய புல்வெளியில் சில நேரம் காட்டு யானைகள் தென்படும். அடுத்தது எக்கோ பாயிண்ட் (Echo Point). ஏரிக்கரையில் நின்று கத்தினால் எதிரொலி கேட்கும். கூட்டமும் கத்தும், சோளக் கடைக்காரரும் கத்துவார். அதற்கடுத்தது குண்டலை ஏரி (Kundala Lake). இங்கே மிதிபடகும், சிறிய அணையும் உண்டு.
டாப் ஸ்டேஷன் மூணாறிலிருந்து சுமார் 32 கி.மீ. இது கேரளா–தமிழ்நாடு எல்லை. ஆங்கிலேயர் காலத்தில் இங்கிருந்து கீழே போடி பக்கத்துக்கு கயிற்றுப் பாதை வழியாகத் தேயிலை அனுப்பப்பட்டது, அதனால்தான் இந்தப் பெயர். தெளிவான நாளில் கீழே தேனி சமவெளி முழுவதும் தெரியும். மேகம் சூழ்ந்துவிட்டால் வெள்ளைச் சுவர் மட்டும்தான் தெரியும். அதனால் காலையிலேயே கிளம்புங்கள்.
மழைக்குப் பின் பார்க்க வேண்டியவை அருவிகள். டவுனிலிருந்து சுமார் 9 கி.மீ. தூரத்தில் ஆட்டுக்கல் அருவி (Attukal Waterfalls) இருக்கிறது. மறையூர் சாலையில் லக்கம் அருவி (Lakkam Waterfalls) உண்டு, அங்கே ஆழமில்லாத இடத்தில் கால் நனைக்கலாம். கொச்சியிலிருந்து வரும் வழியில் சீயப்பாறை (Cheeyappara), வாளறை (Valara) அருவிகள் சாலையோரத்திலேயே கொட்டுகின்றன. வண்டியை நிறுத்தியவுடன் குரங்குகள் வந்துவிடும், கையில் இருக்கும் தின்பண்டங்களைப் பத்திரமாக வைத்துக்கொள்ளுங்கள்.
தேயிலை எப்படி இலையிலிருந்து தூளாகிறது என்று தெரிந்துகொள்ள நல்லதண்ணியில் உள்ள டாடா தேயிலை அருங்காட்சியகத்துக்குப் (Tea Museum) போகலாம். பழைய இயந்திரங்கள், புகைப்படங்கள், சின்ன ஆவணப்படம் எல்லாம் இருக்கின்றன. உள்ளே நுழைந்ததுமே வறுத்த தேயிலையின் வாசனை வரும். அங்கேயே தேயிலையை ருசி பார்க்கவும் வாங்கவும் முடியும்.
மூணாறிலிருந்து சுமார் 40 கி.மீ. தூரத்தில் மறையூர் (Marayur) இருக்கிறது. அங்கே போகும் பயணம் ஒரு தனி அனுபவம். கேரளாவில் இயற்கையாகச் சந்தன மரங்கள் வளரும் அரிய பகுதி இது. கற்கால முனியறைகள் (dolmens), கரும்புத் தோட்டங்களில் தயாராகும் மறையூர் வெல்லம் இவையும் இங்கே பிரபலம். அதையும் தாண்டினால் சின்னார் வனவிலங்கு சரணாலயம் (Chinnar Wildlife Sanctuary) வருகிறது. மழை மறைவுப் பகுதி என்பதால் அங்கே வறண்ட காடு. சாம்பல் நிற அணில், சில நேரம் யானைகளையும் பார்க்கலாம்.
நேரம் இருந்தால் கொச்சி சாலையில் உள்ள லாக்ஹார்ட் கேப் (Lockhart Gap), போத்தமேடு (Pothamedu) காட்சி முனைகளில் நின்று தேயிலைச் சரிவுகளைப் பார்க்கலாம். பள்ளிவாசல் பகுதியிலிருந்து சுமார் 22 கி.மீ. தூரத்தில் ஆனையிறங்கல் அணை (Anayirangal Dam) இருக்கிறது, தேயிலைத் தோட்டங்களுக்கு நடுவே அமைதியான நீர்த்தேக்கம். விஷயம் தெரிந்தவர்கள் அதிகாலை ஜீப்பில் கொழுக்குமலை (Kolukkumalai) போவார்கள். உலகின் உயரமான தேயிலைத் தோட்டங்களில் ஒன்று அது, சூரிய உதயத்துக்குப் பெயர் போனது. சாலை கரடுமுரடானது, முதுகுவலி உள்ளவர்கள் யோசித்து முடிவெடுக்கவும்.
- இரவிகுளம் தேசியப் பூங்கா – டவுனிலிருந்து சுமார் 13 கி.மீ.
- மாட்டுப்பெட்டி அணை – சுமார் 13 கி.மீ.
- எக்கோ பாயிண்ட் – சுமார் 15 கி.மீ.
- டாப் ஸ்டேஷன் – சுமார் 32 கி.மீ.
- ஆட்டுக்கல் அருவி – சுமார் 9 கி.மீ.
- மறையூர் – சுமார் 40 கி.மீ.
- சின்னார் சரணாலயம் – சுமார் 55–60 கி.மீ.
எப்படிப் போவது?
மூணாறுக்கு ரயிலோ விமானமோ நேரடியாக இல்லை. கடைசி பகுதியை எப்படியும் மலைச்சாலையில்தான் கடக்க வேண்டும். கேரளா பக்கமிருந்து வருபவர்கள் கொச்சி–கோதமங்கலம்–அடிமாலி வழியாக வரலாம். இந்தச் சாலை அகலமானது, வழி நெடுக அருவிகளும் உண்டு. தமிழ்நாட்டிலிருந்து வருபவர்களுக்கு இரண்டு வழிகள் இருக்கின்றன. ஒன்று தேனி–போடிநாயக்கனூர்–போடிமெட்டு வழி. கொண்டை ஊசி வளைவுகள் அதிகம், காட்சிகளும் அருமை. இன்னொன்று உடுமலைப்பேட்டை–சின்னார்–மறையூர் வழி. இதில் காட்டுப் பாதை வழியாக வர வேண்டும், இரவில் இந்த வழியைத் தவிர்க்கலாம்.
தமிழ்நாடு அரசுப் பேருந்துகள் தேனி, மதுரை, கோவைப் பக்கங்களிலிருந்து மூணாறுக்கு ஓடுகின்றன. கேரள KSRTC பேருந்துகள் கொச்சி, ஆலுவா, எர்ணாகுளத்திலிருந்து அடிக்கடி கிடைக்கும். நேர அட்டவணை மாறும், புறப்படும் முன் பேருந்து நிலையத்தில் உறுதி செய்யவும். டவுனில் சுற்றிப் பார்க்க ஜீப், டாக்ஸி, ஆட்டோ வாடகைக்குக் கிடைக்கும். கட்டணத்தை முன்கூட்டியே பேசி முடிவு செய்துவிடுங்கள்.
- சாலை: கொச்சியிலிருந்து சுமார் 125–130 கி.மீ., மதுரையிலிருந்து சுமார் 160 கி.மீ., தேனியிலிருந்து சுமார் 90 கி.மீ., கோவையிலிருந்து சுமார் 160 கி.மீ.
- ரயில்: ஆலுவா (சுமார் 110 கி.மீ.), எர்ணாகுளம் (சுமார் 130 கி.மீ.); தமிழ்நாடு பக்கம் போடிநாயக்கனூர் (சுமார் 70 கி.மீ.)
- விமானம்: கொச்சி சர்வதேச விமான நிலையம் (சுமார் 110 கி.மீ.), மதுரை விமான நிலையம் (சுமார் 150–160 கி.மீ.)
எப்போது போகலாம்? திருவிழாக்கள்
செப்டம்பர் முதல் மார்ச் வரை மூணாறின் சிறந்த காலம். அக்டோபர்–நவம்பரில் மழை ஓய்ந்து எல்லாம் பச்சையாக இருக்கும். டிசம்பர்–ஜனவரியில் இரவில் குளிர் கடுமையாக இருக்கும், சில உயரமான இடங்களில் அதிகாலை உறைபனி கூட விழுவதுண்டு. அதனால் ஸ்வெட்டர் மட்டும் போதாது, ஒரு ஜாக்கெட்டும் எடுத்துச் செல்லுங்கள். ஏப்ரல்–மே சமவெளிக் கோடையிலிருந்து தப்பிக்க நல்ல நேரம். ஆனால் அதே காரணத்தால் கூட்டமும் அறை வாடகையும் அப்போது ஏறிவிடும்.
ஜூன் முதல் ஆகஸ்ட் வரை தென்மேற்குப் பருவமழை கொட்டும். அருவிகள் முழு வேகத்தில் விழும், மூடுபனி நாள் முழுவதும் சூழ்ந்திருக்கும். மழையை ரசிப்பவர்களுக்கு இது பிடிக்கும். ஆனால் நிலச்சரிவு, சாலை மூடல், அட்டைப்பூச்சித் தொல்லை எல்லாம் இந்தக் காலத்தில் உண்டு. வானிலை அறிவிப்பைப் பார்த்துவிட்டுக் கிளம்புங்கள்.
மூணாறின் பெரிய நிகழ்வு பன்னிரண்டு ஆண்டுகளுக்கு ஒருமுறை மலைகள் முழுவதும் நீல நிறமாக மாறும் நீலக்குறிஞ்சி பூப்பு. கடைசியாக 2018-ல் பூத்தது, அடுத்தது 2030 வாக்கில் எதிர்பார்க்கப்படுகிறது. ஓணம் (ஆகஸ்ட்–செப்டம்பர்) சமயத்தில் கேரள விருந்தும் பூக்கோலமும் பார்க்கலாம். கோடை விடுமுறையில் மலர்க் கண்காட்சி நடைபெறுவது வழக்கம், தேதிகளை உள்ளூரில் உறுதி செய்யவும்.
தங்குமிடமும் சாப்பாடும்
மூணாறு டவுனில் பட்ஜெட் லாட்ஜ்களும் நடுத்தர ஹோட்டல்களும் நிறைய இருக்கின்றன. சித்திரபுரம், பள்ளிவாசல், ஆனச்சால் பக்கங்களில் தேயிலைத் தோட்டத்தைப் பார்த்தபடி அமைந்த ரிசார்ட்களும் ஹோம்ஸ்டேக்களும் உண்டு. பழைய எஸ்டேட் பங்களாக்கள் சிலவும் இப்போது தங்கும் விடுதிகளாக மாறியிருக்கின்றன. அமைதி வேண்டுமென்றால் டவுனுக்கு வெளியே தங்குங்கள். ஆனால் இரவில் சாப்பிடக் கடைக்குப் போக டவுனுக்கு வர வேண்டியிருக்கும், அதையும் கணக்கில் வைத்துக்கொள்ளுங்கள்.
சாப்பாட்டில் இரண்டு பக்கச் சுவையும் கிடைக்கும். கேரள சாப்பாடு, அப்பமும் ஸ்டூவும், புட்டு–கடலைக் கறி, மலபார் பரோட்டா இவை எல்லாம் இருக்கும். அதே தெருவில் இட்லி, தோசை, சாம்பார் போடும் தமிழ் மெஸ்களும் இருக்கின்றன. குளிர் மாலையில் சாலையோரக் கடையில் பருப்பு வடையுடன் ஒரு கிளாஸ் ஏலக்காய் டீ குடித்துப் பாருங்கள். மூணாறு டீ வேறு எங்கேயும் இவ்வளவு சுவையாக இருக்காது என்பது மிகையல்ல.
வீட்டுக்கு வாங்கிச் செல்ல ஏலக்காய், மிளகு, லவங்கப்பட்டை போன்ற மசாலாப் பொருட்கள், தேயிலைத் தூள், வீட்டில் தயாரிக்கும் சாக்லேட், மறையூர் வெல்லம் நல்ல தேர்வுகள். டவுன் கடைகளில் விலை வித்தியாசம் அதிகம், இரண்டு மூன்று கடைகளில் விசாரித்துவிட்டு வாங்குவது நல்லது.
பயணக் குறிப்புகள்: ஒரு நாள், இரண்டு நாள் திட்டம்
ஒரே நாளில் எல்லாவற்றையும் பார்க்க முயன்றால் பெரும்பாலான நேரம் வண்டியில்தான் போகும். குறைந்தது இரண்டு இரவுகள் தங்கினால்தான் நிதானமாகப் பார்க்க முடியும். மறையூர், சின்னார், கொழுக்குமலை எல்லாம் சேர்க்க வேண்டுமென்றால் மூன்று நாள் தேவை.
சில எச்சரிக்கைகள். மலைச்சாலைகளில் மாலை 6 மணிக்குப் பிறகு மூடுபனியில் வண்டி ஓட்டுவது ஆபத்து. காட்டு யானைகள் சாலையைக் கடப்பதும் உண்டு, ஹாரன் அடித்து அவற்றைத் தொந்தரவு செய்யாதீர்கள். மழைக்காலத்தில் அட்டைகளிடமிருந்து தப்பிக்கக் காலில் உப்பு அல்லது அட்டை விரட்டி தடவிக்கொள்ளுங்கள். பிளாஸ்டிக் பயன்பாட்டுக்குக் கட்டுப்பாடுகள் உண்டு. இரவிகுளம் போன்ற இடங்களுக்கு டிக்கெட் நடைமுறையும் நேரமும் மாறுவதால் அதிகாரப்பூர்வ தளத்தில் சரிபார்க்கவும்.
- ஒரு நாள்: காலை இரவிகுளம் → தேயிலை அருங்காட்சியகம் → மதியச் சாப்பாடு → மாட்டுப்பெட்டி, எக்கோ பாயிண்ட், குண்டலை ஏரி → மாலை டவுன் கடைவீதி
- இரண்டு நாள் – முதல் நாள்: இரவிகுளம், தேயிலை அருங்காட்சியகம், ஆட்டுக்கல் அருவி, லாக்ஹார்ட் கேப்
- இரண்டு நாள் – இரண்டாம் நாள்: அதிகாலையே டாப் ஸ்டேஷன் → திரும்பும் வழியில் குண்டலை, எக்கோ பாயிண்ட், மாட்டுப்பெட்டி → மாலை ஓய்வு
- மூன்றாம் நாள் இருந்தால்: லக்கம் அருவி → மறையூர் சந்தனக் காடு, முனியறைகள் → சின்னார்
- எடுத்துச் செல்ல: ஜாக்கெட், மழைக்கோட்டு, நல்ல பிடிப்புள்ள காலணி, வாந்தி மாத்திரை (வளைவுச் சாலைகளுக்கு)
அருகில் உள்ள மற்ற இடங்கள்
மூணாறிலிருந்து சுமார் 50 கி.மீ. தூரத்துக்கு அப்பால் போக நேரம் இருந்தால் சில இடங்களைச் சேர்க்கலாம். மறையூருக்கு அடுத்துள்ள காந்தலூர் (Kanthalloor) ஆப்பிள், ஆரஞ்சு, பிளம் தோட்டங்களுக்குப் பெயர் போனது. காலநிலைக்கு ஏற்ப பழங்கள் கிடைக்கும். தேக்கடி–குமுளி சுமார் 90–100 கி.மீ. தூரத்தில் இருக்கிறது. மூணாறு–தேக்கடி–வாகமண் என்று இணைத்து ஒரு வாரப் பயணமாகத் திட்டமிடுவது பலரின் வழக்கம். தமிழ்நாட்டுப் பக்கம் போடிமெட்டிலிருந்து இறங்கும் வழியில் ஏலக்காய்த் தோட்டங்களும் போடி நகரமும் வரும்.
அடிக்கடி கேட்கப்படும் கேள்விகள்
மூணாறு போக சிறந்த நேரம் எது?
செப்டம்பர் முதல் மார்ச் வரை சிறந்த காலம். அக்டோபர்–நவம்பரில் பசுமை அதிகமாக இருக்கும், டிசம்பர்–ஜனவரியில் குளிர் அதிகம். மழையை ரசிப்பவர்கள் ஜூன்–ஆகஸ்ட் போகலாம், ஆனால் நிலச்சரிவு, சாலை மூடல் அபாயம் உண்டு.
மூணாறு பார்க்க எத்தனை நாள் தேவை?
முக்கிய இடங்களுக்கு இரண்டு நாள் போதும். மறையூர், சின்னார், கொழுக்குமலை எல்லாம் சேர்க்க வேண்டுமென்றால் மூன்று நாள் திட்டமிடுங்கள்.
சென்னை அல்லது மதுரையிலிருந்து மூணாறு எப்படிப் போவது?
மதுரையிலிருந்து தேனி–போடி–போடிமெட்டு வழியாகச் சுமார் 160 கி.மீ. பயணம். சென்னையிலிருந்து மதுரை அல்லது போடிநாயக்கனூர் வரை ரயிலில் போய், அங்கிருந்து பேருந்து அல்லது டாக்ஸியில் செல்லலாம். கொச்சி வழியாகவும் போகலாம்.
இரவிகுளம் தேசியப் பூங்கா எப்போதும் திறந்திருக்குமா?
இல்லை. வரையாடுகள் குட்டி போடும் காலத்தில் (பொதுவாக பிப்ரவரி–மார்ச் வாக்கில்) சில வாரங்கள் மூடப்படும். திறப்பு நேரம், டிக்கெட் விவரங்களை வனத்துறையின் அதிகாரப்பூர்வ தளத்தில் உறுதி செய்யவும்.
நீலக்குறிஞ்சி அடுத்து எப்போது பூக்கும்?
பன்னிரண்டு ஆண்டுகளுக்கு ஒருமுறை பூக்கும். கடைசியாக 2018-ல் பூத்தது, அடுத்தது 2030 வாக்கில் எதிர்பார்க்கப்படுகிறது.
மூணாறில் தமிழ் பேசுவார்களா?
ஆம். தோட்டத் தொழிலாளர்கள், கடைக்காரர்கள் உட்பட பலர் தமிழ் பேசுவார்கள். தமிழ்நாட்டுப் பயணிகளுக்கு மொழிப் பிரச்சனை பெரிதாக இருக்காது.